Puče spli'ski!
Ulizamo u dane Sudamje 2020., fešte posvećene patronu našega grada svetomen Duji. Ovi naš, deboto ijadu godin, stari tradicjun, ča je detaljno notan u sačuvanomen Statutu iz 1312. zaraj znanih okolnosti ove godine proslavjamo u skromnijem izdanju.
U svojoj dugoj povisti blagdan sv. Dujma bija je više puti u "karanteni" od "španjole" do posliratnih godin u bivšoj državi pa je i ove godine prilagođen ovoj "korona izolaciji".
Poznato je da smo mi Splićani judi o' fešte i da je Fjera o' svetega Duje naš najveći blagdan kad cili grad izajde na kale i pjace, a najskoli na Rivu. Ovi put, nažalost, ovi naš konfužjun o' svita moramo smanjit i uklopit u ne samo 'rvatske vengo i svitske mire zaštite od pandemije. Zaraj tega će se blagdan sv. Duje obilježit na način da se izbjegnu velika okupljanja, a da se ipak ne zaudobe običaji i tradicija.
Vjerski dio odvijat će se u Katedrali sv. Dujma jur od 28. travnja sa devetnicon. Užežin samog blagdana, 6. svibnja, naš nadbiskup i gradonačelnik će svečano otvorit moćnik sv. Dujma, a zaramisto Vele mise na Rivi i masovnog prisustva vjernika na sam blagdan 7. svibnja u 10 uri će splitsko-makarski nadbiskup don Marin Barišić uz nekolicinu svećenika održat svečanu misu u Katedrali koja će bit prenošena na prvon programu HTV-a.
Svitovni dil programa ove ćemo godine zaraj zdravja svih nas morat priskočit. Nima Fjere, nima Sajma Sudamje, ni tradicjonalne splis'ke tonbule, nima Turnira o' balot ni športskih priredbi, ni koncerta, ni vatrometa. Sve ča budemo priredili obilježavat će se priko ekrana lokalnih TV kuća, radija i društvenih mriža, a vi ćete sve moć pratit s familijon od doma.
Svitu naš!
Proć će i ova dižgracija o'virusa pa ćemo sve nadoknadit idućih godin, još žešće i još bogatije. Sve ćemo refat – samo da Bog da zdravja! Da se ne zaudobidu običaji, ka ča je to zapisano u Statutu našega grada iz 1312. godine -
Određijemo i naređijemo:
- da ovu feštu proslavimo u okruženju vlastitog doma i familije;
- da se cili grad uresi rvackin, splis'kin i bandirama o' sv. Duje;
- da i Vaše ponistre i balkone uresite bandirama joli narodnin tapetiman kako je to nekad bilo;
- da se upali svečana rasvjeta grada;
- da se uredidu okućnice i portuni;
- da se u dane blagdana ne dogode barufe, tuče i lupešćine i da se poštijedu odluke Nacionalnog stožera.
Puče spli'ski!
Znamo da van se teško suspregnit jerbo ovu Feštu žejno očekujete.Kad zazvone sva crkvena zvona proslavimo Sudamju u našin srciman! Sitimo se prijateja i poznanika i telefonon im zaželimo:
ZDRAVI I VESELI BILI I NA BOLJE VAN DOŠLA SUDAMJA!
GRAD SPLIT
ODBOR SUDAMJE